ಹೊಗಳು ಭಟ್ಟರ ಸಂತೆ -
ಇದು ಲೋಕವಂತೆ !
ಎಲ್ಲೆಲ್ಲಿಯೂ ಇವರೆ,
ಕಂತೆ ಕಂತೆ !
ಆದರ್ಶ-ಗೀದರ್ಶ
ಬರಿ ಬಣಗು ಕಂಥೆ
ಪುಸ್ತಕದ ಬದನೆ ಕಾಯ್
ತಿನುವುದಕೆ ಬಂತೆ?
ಬಾ ಹರಟು ಒಣ ಹರಟೆ
ಸಿಗರೇಟು ಹಚ್ಚು,
ಅವಳಂತೂ, ಇವಳಿಂತು -
ಇದೆ ನನಗೆ ಮೆಚ್ಚು.
ರಸಿಕತನ ಬೇಕಯ್ಯ
ಏನಿದ್ದರೇನು?
ಬಂಡಿಗಟ್ಟಲೆ ಓದಿ
ನೀ ಪದೆದುದೇನು?
ನೀ ಇಂದ್ರ ನೀ ಚಂದ್ರ
ಕಲಿಕರ್ಣ ಪಿಂಡ !
(ನಾನು ಅವರೊಳಗೊಬ್ಬ)
ಬಹದ್ದೂರ ಗಂಡ !
ಹೊಗಳಿ ಹೊಗಳಿಸಿಕೊಳುವ
ಚಿಂತೆಯೇ ಚಿಂತೆ.
ಒಂಟೆ ಮದುವೆಗೆ ಕತ್ತೆ
ಪದ ಹೇಳಿದಂತೆ.
- ಜಿ ಎಸ್ ಶಿವರುದ್ರಪ್ಪ
('ದೇವಶಿಲ್ಪ' ಕವನ ಸಂಕಲನದಿಂದ)
ಕಾಮೆಂಟ್‌ಗಳಿಲ್ಲ:
ಕಾಮೆಂಟ್‌ ಪೋಸ್ಟ್ ಮಾಡಿ
ನಿಮ್ಮ ಉನ್ಮಾದದ ನಶೆ ನಮ್ಮೊಂದಿಗಿಷ್ಟು ಹಂಚಿಕೊಳ್ರಿ....