ಮೂರ್ತಿಯ ಚಂದ್ರ

ಎಲ್ಲಿಗೆ ನಾ ಹೋದರಲ್ಲಿಗೆ ಬರುವನು,
ಅಮ್ಮಾ, ಚಂದಿರ ನನ್ನವನು;
ನಿನ್ನವ ನಾನಾಗಿರುವುದರಿಂದ.
ಅಮ್ಮಾ, ಚಂದಿರ ನಿನ್ನವನು
ಮೂಡಣ ದೆಸೆಯೊಳು ಗಿರಿಗಳನೇರುತ
ಓಡುತ ಬರುತಿರೆ ನನಗಾಗಿ
ಮೂಡುವನೆಂಬರು ಜನರೆಲಮ್ಮಾ,
ಕೂಡಲು ಬರುತಿರೆ ಮೂರ್ತಿಯನು !
ನಮ್ಮನೆಯಂಗಳದಲ್ಲಾಡುತಿರೆ ನಾನು
ನೆತ್ತಿಯ ಮೇಲೆಯೆ ತೋರುವನು !
ಮಾವನ ಮನೆಯೊಳಗುಳಿಯಲು ಹೋದರೆ
ಅಲ್ಲಿಗು ಬರುವನು ಚಂದಿರನು !
ನೆರೆಮನೆ ಕಿಟ್ಟುವು ಕರೆದರೆ ಹೋಗನು;
ಮೂರ್ತಿಯನೆಂದೂ ಬಿಟ್ಟಿರನು !
ಎಲ್ಲಿಗೆ ನಾ ಹೋದರಲ್ಲಿಗೆ ಬರುವನು,
ಅಮ್ಮಾ, ಚಂದಿರ ನನ್ನವನು !

                    - ಕುವೆಂಪು

   ('ನನ್ನ ಮನೆ' ಕವನ ಸಂಕಲನದಿಂದ)